Punjab Spectrum
Related Articles
Laljeet Bhullar – ਪੈਸੇ ਦੇ ਸਿਰ ‘ਤੇ ਚੱਲਦੀ ਸਿਆਸਤ ਦੀ ਉਪਜ ਲਾਲਜੀਤ ਭੁੱਲਰ ਦੀ ‘ਕਰੈਸ਼ ਲੈਡਿੰਗ’ ਕੰਧ ‘ਤੇ ਲਿਖੀ ਹੋਈ ਸੀ।
Kamaldeep Singh Brar ਦੀ ਇਹ ਸਾਰੀ ਲਿਖਤ ਪੜ੍ਹਨ ਵਾਲੀ ਹੈ
ਸਾਬਕਾ ਹੋ ਚੁੱਕੇ ਮੰਤਰੀ ਲਾਲਜੀਤ ਸਿੰਘ ਭੁੱਲਰ ਜਿੰਦਗੀ ਦੇ ਜਿਸ ਮੋੜ ‘ਤੇ ਪਹੁੰਚੇ ਹਨ। ਇਹ ਉਨ੍ਹਾਂ ਲੋਕਾਂ ਲਈ ਕੋਈ ਹੈਰਾਨੀ ਵਾਲੀ ਗੱਲ ਨਹੀਂ ਹੈ ਜੋ ਉਨ੍ਹਾਂ ਦੇ ਸਿਆਸੀ ਸਫ਼ਰ ਤੋਂ ਵਾਕਿਫ਼ ਹਨ।
ਲਾਲਜੀਤ ਸਿੰਘ ਭੁੱਲਰ ਤਰਨਤਾਰਨ ਜ਼ਿਲ੍ਹੇ ਦੇ ਪੱਟੀ ਵਿਧਾਨ ਸਭਾ ਹਲਕੇ ਦੀ ਨੁਮਾਇੰਦਗੀ ਕਰਦੇ ਹਨ, ਜੋ ਕਿ ਇਤਿਹਾਸਕ ਤੌਰ ‘ਤੇ ‘ਪੰਥਕ ਸਿਆਸਤ’ ਦਾ ਗੜ੍ਹ ਮੰਨਿਆ ਜਾਂਦਾ ਹੈ। ਪਰ ਭੁੱਲਰ ਦੀ ਸਿਆਸਤ ਚੋਂ ਪੰਥਕ ਤੱਤ ਬਿਲਕੁੱਲ ਗਾਇਬ ਸੀ। ਪੰਥਕ ਤੱਤ ਦੀ ਕਮੀ ਭੁੱਲਰ ਨੇ ਇੱਕ ਵੱਡੇ ਜ਼ਿਮੀਂਦਾਰ ਅਤੇ ਸਫਲ ਆੜ੍ਹਤੀਏ ਵਜੋਂ ‘ਮਨੀ ਪਾਵਰ’ ਨਾਲ ਪੂਰੀ ਕੀਤੀ।
ਪੰਜਾਬ ਦੇ 95% ਸਿਆਸਦਾਨ ਪੈਸੇ ਦੀ ਤਾਕਤ ਸਦਕਾ ਹੀ ਸਿਆਸਤ ‘ਚ ਹਨ। ਜੇ ਉਨ੍ਹਾਂ ਤੋਂ ਪੈਸਾ ਖੋਹ ਲਿਆ ਜਾਵੇ ਤਾਂ ਉਹ ਕੱਖ ਦੇ ਨਹੀਂ ਰਹਿਣਗੇ। ਇਸੇ ਕਰਕੇ ਹਾਲੇ ਵੀ ਲਾਲਜੀਤ ਭੁੱਲਰ ਦੇ ਸਿਆਸੀ ਜੀਵਨ ਅੰਤ ਨਹੀਂ ਲਿਖਿਆ ਜਾ ਸਕਦਾ। ਕਿਉਂਕਿ ਪੈਸਾ ਉੱਨਾਂ ਕੋਲ ਹਾਲੇ ਵੀ ਹੈਗਾ।
ਇਸੇ ਪੈਸੇ ਤਾਕਤ ਸਦਕਾ ਸਦਕਾ ਉਨ੍ਹਾਂ ਨੇ 2022 ਦੀਆਂ ਵਿਧਾਨ ਸਭਾ ਚੋਣਾਂ ਲੜੀਆਂ ਜਿਸ ਵਿੱਚ ਆਪਣੇ ਦੋ ਸਾਬਕਾ ਸਿਆਸੀ ਮਾਰਗਦਰਸ਼ਕਾਂ—ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ (ਅਕਾਲੀ ਦਲ) ਅਤੇ ਹਰਮਿੰਦਰ ਸਿੰਘ ਗਿੱਲ (ਕਾਂਗਰਸ)—ਨੂੰ ਹਰਾਇਆ ਸੀ। ਹਾਲਾਂਕਿ ਉਦੋਂ ਆਮ ਆਦਮੀ ਪਾਰਟੀ ਦੀ ਲਹਿਰ ਕਾਰਨ ਹੀ ਭੁੱਲਰ ਜਿੱਤੇ। ਪਰ ਜੇ ਭੁੱਲਰ ਆਮ ਘਰ ਦੇ ਮੁੰਡੇ ਹੁੰਦੇ ਤਾਂ ਉਨਾਂ ਨੂੰ ਟਿਕਟ ਹੀ ਨਾ ਮਿਲਦੀ। ਜਿੱਤਣਾ ਤਾਂ ਦੂਰ ਦੀ ਗੱਲ ਹੈ।
ਭੁੱਲਰ ਲੰਬੇ ਸਮੇਂ ਤੋਂ ਰਾਜਨੀਤੀ ਵਿੱਚ ਸਰਗਰਮ ਸਨ। ਪਰ ਸਿਰਫ ਆਪਣੇ ਦੋਵੇਂ ਸਾਬਕਾ ਸਿਆਸੀ ਆਕਾਵਾਂ, ਕੈਰੋਂ ਅਤੇ ਗਿੱਲ ਦੇ ਸਮਰਥਕ ਵਜੋਂ। ਭੁੱਲਰ ਦਾ ਸਿਆਸੀ ਸਫ਼ਰ ਕਾਂਗਰਸ ਅਤੇ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਵਿੱਚ ਇੱਕ ਆਮ ਸਮਰਥਕ ਤੋਂ ਸ਼ੁਰੂ ਹੋ ਕੇ ‘ਆਪ’ ਦੇ ਐਨ ਐਲ ਏ ਵਜੋਂ ਸਫਲਤਾ ਹਾਸਲ ਕਰਨ ਤੱਕ ਪਹੁੰਚਿਆ।
ਪੰਜਾਬ ਵਿੱਚ ਕਾਂਗਰਸ ਸਰਕਾਰ ਦੌਰਾਨ ਭੁੱਲਰ ਪੱਟੀ ਦੀ ਆੜ੍ਹਤੀਆ ਐਸੋਸੀਏਸ਼ਨ ਦੇ ਪ੍ਰਧਾਨ ਬਣਨਾ ਚਾਹੁੰਦੇ ਸਨ ਅਤੇ ਉਨ੍ਹਾਂ ਨੂੰ ਉਮੀਦ ਸੀ ਕਿ ਵਿਧਾਇਕ ਗਿੱਲ ਉਨ੍ਹਾਂ ਦੀ ਮਦਦ ਕਰਨਗੇ। ਪਰ ਗਿੱਲ ਨੇ ਉਨ੍ਹਾਂ ਦੇ ਨਾਂ ਦੀ ਹਮਾਇਤ ਨਹੀਂ ਕੀਤੀ।
ਜਲਦੀ ਹੀ ਉਹ ‘ਆਪ’ ਵਿੱਚ ਸ਼ਾਮਲ ਹੋ ਗਏ ਅਤੇ ਉਨ੍ਹਾਂ ਨੂੰ ਪੱਟੀ ਦਾ ਹਲਕਾ ਇੰਚਾਰਜ ਨਿਯੁਕਤ ਕਰ ਦਿੱਤਾ ਗਿਆ।
ਉਨ੍ਹਾਂ ਨੇ ਖੇਤਰ ਵਿੱਚ ‘ਆਪ’ ਦੀ ਲਹਿਰ ਦੌਰਾਨ ਪੱਟੀ ਸੀਟ ਆਸਾਨੀ ਨਾਲ ਜਿੱਤ ਲਈ ਸੀ। ਉਸ ਸਮੇਂ ਮਜੀਠਾ ਨੂੰ ਛੱਡ ਕੇ ਆਪ ਪਾਰਟੀ ਨੇ ਤਰਨਤਾਰਨ ਅਤੇ ਅੰਮ੍ਰਿਤਸਰ ਜ਼ਿਲ੍ਹਿਆਂ ਦੀਆਂ ਸਾਰੀਆਂ ਸੀਟਾਂ ਜਿੱਤੀਆਂ ਸਨ।
ਭੁੱਲਰ ਨੂੰ ਮੁੱਖ ਮੰਤਰੀ ਮਾਨ ਦਾ ਕਰੀਬੀ ਮੰਨਿਆ ਜਾਂਦਾ ਸੀ ਅਤੇ ਉਹ ਤਰਨਤਾਰਨ ਜ਼ਿਲ੍ਹੇ ਤੋਂ ਕੈਬਨਿਟ ਮੰਤਰੀ ਬਣਨ ਵਾਲੇ ਇਕਲੌਤੇ ਵਿਧਾਇਕ ਸਨ। ਮਾਨ ਦੀ ਕੈਬਨਿਟ ਵਿੱਚ ਕਈ ਵਾਰ ਫੇਰਬਦਲ ਹੋਏ, ਪਰ ਭੁੱਲਰ ਉਨ੍ਹਾਂ ਕੁਝ ਮੰਤਰੀਆਂ ਵਿੱਚੋਂ ਇੱਕ ਸਨ ਜੋ ਆਪਣੀ ਕੁਰਸੀ ਬਚਾਉਣ ਵਿੱਚ ਕਾਮਯਾਬ ਰਹੇ।
ਪਹਿਲੀ ਵਾਰ ਵਿਧਾਇਕ ਬਣੇ ਭੁੱਲਰ ਨੂੰ ਜੂਨ 2022 ਵਿੱਚ ਟਰਾਂਸਪੋਰਟ ਮੰਤਰੀ ਬਣਾਇਆ ਗਿਆ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ 2024 ਵਿੱਚ ਖਡੂਰ ਸਾਹਿਬ ਹਲਕੇ ਤੋਂ ਮੌਜੂਦਾ ਸੰਸਦ ਮੈਂਬਰ ਅੰਮ੍ਰਿਤਪਾਲ ਸਿੰਘ ਵਿਰੁੱਧ ਲੋਕ ਸਭਾ ਚੋਣ ਲੜੀ ਪਰ ਹਾਰ ਗਏ।
ਵਿਵਾਦਾਂ ਦੀ ਸੂਚੀ
ਸਰਕਾਰੀ ਕਰਮਚਾਰੀ ਨੂੰ ਧਮਕਾਉਣ ਦੇ ਮੌਜੂਦਾ ਦੋਸ਼ ਭੁੱਲਰ ਦੇ ਪੁਰਾਣੇ ਵਿਵਾਦਾਂ ਦੇ ਅਨੁਕੂਲ ਹੀ ਹਨ, ਜਿਨ੍ਹਾਂ ਵਿੱਚ ਉਨ੍ਹਾਂ ਵੱਲੋਂ ਸੱਤਾ ਦੀ ਸ਼ਰੇਆਮ ਦੁਰਵਰਤੋਂ ਸਾਹਮਣੇ ਆਉਂਦੀ ਰਹੀ ਹੈ।
• ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ (ਜੂਨ 2022): ਟਰਾਂਸਪੋਰਟ ਮੰਤਰੀ ਬਣਨ ਤੋਂ ਤੁਰੰਤ ਬਾਅਦ ਇੱਕ ਵੀਡੀਓ ਸਾਹਮਣੇ ਆਈ ਸੀ ਜਿਸ ਵਿੱਚ ਭੁੱਲਰ ਅੱਲੜ ਮੁੰਡਿਆਂ ਵਾਂਗ ਵਿਵਹਾਰ ਕਰਦੇ ਦਿਖਾਈ ਦਿੱਤੇ। ਵੀਡੀਓ ਵਿੱਚ ਉਹ ਇੱਕ ਤੇਜ਼ ਰਫਤਾਰ SUV ਦੀ ਸਨਰੂਫ ਤੋਂ ਬਾਹਰ ਨਿਕਲ ਕੇ ਹੱਥ ਹਿਲਾ ਰਹੇ ਸਨ ਅਤੇ ਉਨ੍ਹਾਂ ਦੇ ਸੁਰੱਖਿਆ ਕਰਮੀ ਨਾਲ ਚੱਲ ਰਹੀ ਗੱਡੀ ਨਾਲ ਖਤਰਨਾਕ ਤਰੀਕੇ ਨਾਲ ਲਟਕਦੇ ਦਿਖਾਈ ਦਿੱਤੇ। “ਟਰਾਂਸਪੋਰਟ ਮੰਤਰੀ” ਵੱਲੋਂ ਸੜਕ ਸੁਰੱਖਿਆ ਨਿਯਮਾਂ ਦੀਆਂ ਧੱਜੀਆਂ ਉਡਾਉਣ ‘ਤੇ ਉਨ੍ਹਾਂ ਵਿਰੁੱਧ ਕੋਈ ਕਾਰਵਾਈ ਨਹੀਂ ਕੀਤੀ ਗਈ।
• ਜਾਤੀਵਾਦੀ ਟਿੱਪਣੀਆਂ (2024): ਖਡੂਰ ਸਾਹਿਬ ਲੋਕ ਸਭਾ ਸੀਟ ਲਈ ਪੱਟੀ ਵਿੱਚ ਇੱਕ ਚੋਣ ਰੈਲੀ ਦੌਰਾਨ ਭੁੱਲਰ ਨੇ ਆਪਣੇ ਵਿਰੋਧੀ ਹਰਮਿੰਦਰ ਸਿੰਘ ਗਿੱਲ ਨੂੰ ਨਿਸ਼ਾਨਾ ਬਣਾਉਣ ਲਈ ਦੋ ਖਾਸ ਜਾਤੀਆਂ ਵਿਰੁੱਧ ਕਥਿਤ ਤੌਰ ‘ਤੇ ਅਪਮਾਨਜਨਕ ਟਿੱਪਣੀਆਂ ਕੀਤੀਆਂ ਸਨ। ਇਸ ਦਾ ਵਿਰੋਧ ਇੰਨਾ ਤਿੱਖਾ ਸੀ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਉਨ੍ਹਾਂ ਦੀ ਤਰਫੋਂ ਜਨਤਕ ਮੁਆਫੀ ਮੰਗਣੀ ਪਈ ਅਤੇ ਕਹਿਣਾ ਪਿਆ ਕਿ ਅਜਿਹਾ ਵਿਵਹਾਰ ਭਵਿੱਖ ਵਿੱਚ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਹਾਲਾਂਕਿ, ਭੁੱਲਰ ਮਾਨ ਦੀ ਨੇੜਤਾ ਦਾ ਅਨੰਦ ਮਾਣਦੇ ਰਹੇ ਅਤੇ ਉਨ੍ਹਾਂ ਵਿਰੁੱਧ FIR ਦੀ ਮੰਗ ਨੂੰ ਅਣਗੌਲਿਆ ਕਰ ਦਿੱਤਾ ਗਿਆ।
• ਜ਼ਹਿਰੀਲੀ ਸ਼ਰਾਬ ਕਾਂਡ ਦੇ ਮੁਲਜ਼ਮਾਂ ਨਾਲ ਸਾਂਝ: ਭੁੱਲਰ ਨੇ ਗੁਰਪਾਲ ਢੋਟੀਆਂ ਅਤੇ ਉਸ ਦੇ ਭਰਾ ਰਸ਼ਪਾਲ ਢੋਟੀਆਂ ਨਾਲ ਸੰਬੰਧ ਸਥਾਪਿਤ ਕੀਤੇ। ਗੁਰਪਾਲ 2020 ਦੇ ਜ਼ਹਿਰੀਲੀ ਸ਼ਰਾਬ ਕਾਂਡ ਦਾ ਮੁਲਜ਼ਮ ਸੀ ਜਿਸ ਵਿੱਚ 100 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ ਸੀ। ਭੁੱਲਰ ਨੇ ਸੰਸਦੀ ਚੋਣਾਂ ਵਿੱਚ ਉਨ੍ਹਾਂ ਦੀ ਹਮਾਇਤ ਲੈਣ ਲਈ ਉਨ੍ਹਾਂ ਦੇ ਘਰ (ਜਿਸ ਨੂੰ ਪੁਲਿਸ ਨੇ ਪਹਿਲਾਂ ਅਟੈਚ ਕੀਤਾ ਸੀ) ਦਾ ਦੌਰਾ ਵੀ ਕੀਤਾ। ਇਹ ਪੀੜਤ ਪਰਿਵਾਰਾਂ ਦੇ ਜ਼ਖ਼ਮਾਂ ‘ਤੇ ਲੂਣ ਲਾਉਣ ਦਾ ਕੰਮ ਸੀ।
• ਪੰਚਾਇਤੀ ਚੋਣਾਂ ਵਿੱਚ ਦਖਲਅੰਦਾਜ਼ੀ ਦੇ ਦੋਸ਼: ਪੱਟੀ ਹਲਕੇ ਵਿੱਚ ਭੁੱਲਰ ਦੇ ਪ੍ਰਭਾਵ ਹੇਠ ਕਈ ਪਿੰਡਾਂ ਦੀਆਂ ਪੰਚਾਇਤਾਂ “ਸਰਬਸੰਮਤੀ” ਨਾਲ ਚੁਣੀ ਗਈ ਸੀ। ਵਿਰੋਧੀਆਂ ਨੇ ਦੋਸ਼ ਲਾਇਆ ਕਿ ਵਿਰੋਧੀ ਉਮੀਦਵਾਰਾਂ ਨੂੰ ਨਾਮਜ਼ਦਗੀਆਂ ਦਾਖਲ ਕਰਨ ਤੋਂ ਰੋਕਣ ਲਈ “ਗੁੰਡਿਆਂ” ਦੀ ਵਰਤੋਂ ਕੀਤੀ ਗਈ ਅਤੇ ਇਹ ਯਕੀਨੀ ਬਣਾਉਣ ਲਈ ਫਾਈਲਾਂ ਪਾੜ ਦਿੱਤੀਆਂ ਗਈਆਂ ਕਿ ‘ਆਪ’ ਸਮਰਥਿਤ ਉਮੀਦਵਾਰ—ਜਿਨ੍ਹਾਂ ਵਿੱਚ ਅਪਰਾਧਿਕ ਪਿਛੋਕੜ ਵਾਲੇ ਵਿਅਕਤੀ ਵੀ ਸ਼ਾਮਲ ਸਨ—ਬਿਨਾਂ ਮੁਕਾਬਲਾ ਜਿੱਤ ਜਾਣ।
ਭੁੱਲਰ ਆਪਣੇ ਘਰ ਕਚਹਿਰੀਆਂ ਲਾ ਰਹੇ ਸਨ। ਫ਼ੈਸਲਿਆਂ ਦੀਆਂ ਵੀਡੀੳੇ ਵਾਇਰਲ ਕਰ ਰਹੇ ਸਨ। ਅਜਿਹੀ ਹੀ ਇੱਕ ਕਚਿਹਰੀ ਵਿੱਚ ਉੱਨਾਂ ਗਗਨਦੀਪ ਸਿੰਘ ਰੰਧਾਵੇ ਤੋਂ ਮਾਫ਼ੀ ਮੰਗਵਾ ਲਈ। ਇਸ ਕਚਿਹਰੀ ਵਿੱਚ ਭੁੱਲਰ ਆਪ ਹੀ ਪੀੜਤ ਸਨ ਤੇ ਆਪ ਹੀ ਜੱਜ।
ਰੰਧਾਵੇ ਨਾਲ ਜੋ ਹੋਇਆ ਸਿਰਫ ਭੁੱਲਰ ਦੀ ਗਲਤੀ ਨਹੀਂ ਹੈ। ਇਸ ਉਸ ਸਿਆਸੀ ਸਿਸਟਮ ਦੀ ਗਲਤੀ ਹੈ ਜਿੱਥੇ ਪੈਸੇ ਦੇ ਜ਼ੋਰ ‘ਤੇ ਕੋਈ ਵੀ ਸਿਆਸੀ ਸਫਲਤਾ ਹਾਸਲ ਕਰ ਸਕਦਾ ਹੈ। ਫੇਰ ਉਸ ਨੂੰ ਸਮਝ ਆ ਜਾਂਦਾ ਹੈ ਕਿ ਜਿੰਨਾ ਜ਼ਿਆਦਾ ਪੈਸਾ ਹੋਊ ਉਨੀ ਸੋਖੀ ਇਹ ਸਫਲਤਾ ਸੰਭਾਲ ਕੇ ਰੱਖੀ ਜਾ ਸਕਦੀ ਹੈ। ਕੁੱਝ ਜ਼ਿਆਦਾ ਤੇਜ਼ੀ ਫੜ ਜਾਂਦੇ ਨੇ ਤੇ ਮੂਧੇ ਮੂੰਹ ਡਿੱਗ ਜਾਂਦੇ ਨੇ।
You must be logged in to post a comment.