Punjab Spectrum
Related Articles
Canada – ਕੈਨੇਡਾ: ਇੱਕ ਹਫ਼ਤੇ ’ਚ 3 ਭਾਰਤੀ ਮੂਲ ਦੇ ਨੌਜਵਾਨਾਂ ਦੀ ਹੱਤਿਆ
ਹਾਲ ਹੀ ਵਿੱਚ ਆਈਆਂ ਮੀਡੀਆ ਰਿਪੋਰਟਾਂ ਅਨੁਸਾਰ ਪਿਛਲੇ ਸੱਤ ਦਿਨਾਂ ਦੌਰਾਨ ਕੈਨੇਡਾ ਵਿੱਚ ਭਾਰਤੀ ਮੂਲ ਦੇ ਤਿੰਨ ਵਿਅਕਤੀ ਮਾਰੇ ਗਏ ਹਨ। ਇਨ੍ਹਾਂ ਵਿੱਚੋਂ ਦੋ ਕਤਲ ਦੇ ਮਾਮਲੇ ਹਨ, ਜਦੋਂ ਕਿ ਇੱਕ ਦੀ ਮੌਤ ਸਮੂਹਿਕ ਝੜਪ ਵਿੱਚ ਹੋਈ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਦੇ ਦੋਸਤਾਂ ਨੂੰ ਚਿੰਤਾ ਹੈ ਕਿ ਉਹ ਨਸਲੀ ਨਫ਼ਰਤ (Racial Hate Crime) ਦਾ ਨਿਸ਼ਾਨਾ ਬਣੇ ਸਨ।
ਬਿਰਿੰਦਰ ਸਿੰਘ ਦੀ ਮੌਤ ਅਤੇ ਨਸਲੀ ਨਫ਼ਰਤ ਦਾ ਖ਼ਦਸ਼ਾ
ਐਡਮੰਟਨ ਨਿਵਾਸੀ 22 ਸਾਲਾ ਬਿਰਿੰਦਰ ਸਿੰਘ ਦੀ 14 ਮਾਰਚ ਨੂੰ ਲੇਡੁਕ ਦੇ ਦੱਖਣ ਵਿੱਚ ਹਾਈਵੇਅ ‘ਤੇ ਗੱਡੀ ਚਲਾਉਂਦੇ ਸਮੇਂ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਜਦੋਂ ਕਿ 13 ਮਾਰਚ ਨੂੰ ਉੱਤਰੀ ਬੈਟਲਫੋਰਡ, ਸਸਕੈਚਵਨ ਵਿੱਚ ਕੰਮ ਵਾਲੀ ਥਾਂ ‘ਤੇ ਗੋਲੀਬਾਰੀ ਦੌਰਾਨ 31 ਸਾਲਾ ਦਵਿੰਦਰ ਸਿੰਘ ਦੀ ਮੌਤ ਹੋ ਗਈ ਸੀ ਅਤੇ ਉਸੇ ਦਿਨ ਫੋਰਟ ਸੇਂਟ ਜੌਨ ਦੇ ਬਾਹਰ ਇੱਕ ਝਗੜੇ ਦੌਰਾਨ 25 ਸਾਲਾ ਗੁਰਕੀਰਤ ਸਿੰਘ ਮਨੋਚਾ ਸ਼ਿਕਾਰ ਹੋ ਗਿਆ।
ਗਲੋਬਲ ਨਿਊਜ਼ ਨੇ ਮੰਗਲਵਾਰ ਨੂੰ ਬਿਰਿੰਦਰ ਦੇ ਇੱਕ ਦੋਸਤ ਦੇ ਹਵਾਲੇ ਨਾਲ ਕਿਹਾ, “ਅਸੀਂ ਸਿਰਫ ਇੱਕ ਗੋਲੀ ਦੀ ਆਵਾਜ਼ ਸੁਣੀ, ਅਤੇ ਇੱਕ ਮਿੰਟ ਦੇ ਅੰਦਰ ਹੀ ਸਭ ਕੁਝ ਵਾਪਰ ਗਿਆ, ਸਭ ਕੁਝ ਬਦਲ ਗਿਆ ਹੈ।” ਉਹ ਸ਼ਨਿਚਰਵਾਰ ਦੁਪਹਿਰ ਨੂੰ QEII ਰਾਹੀਂ ਪਹਾੜਾਂ ਵੱਲ ਜਾ ਰਹੇ ਸਨ ਅਤੇ ਲੇਡੁਕ ਤੋਂ ਕੁਝ ਮਿੰਟ ਦੱਖਣ ਵਿੱਚ ਹੀ ਸਨ, ਜਦੋਂ ਉਨ੍ਹਾਂ ਦੀ ਹੌਂਡਾ ਸਿਵਿਕ ਦੇ ਕੋਲ ਇੱਕ ਪਿਕਅੱਪ ਟਰੱਕ ਆ ਕੇ ਰੁਕਿਆ। ਉਹ ਅਲਬਰਟਾ ਸੂਬੇ ਵਿੱਚ ਏਡਮੰਟਨ ਤੋਂ ਲਗਪਗ 35 ਕਿਲੋਮੀਟਰ ਦੂਰ ਲੇਡੁਕ ਦੇ ਦੱਖਣ ਵਿੱਚ ਹਾਈਵੇਅ 2 ‘ਤੇ ਸਨ।
ਬਿਰਿੰਦਰ ਦੇ ਦੋਸਤਾਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਪਹਿਲਾਂ ਕਦੇ ਵੀ ਟਰੱਕ ਵਿੱਚ ਸਵਾਰ ਲੋਕਾਂ ਨੂੰ ਨਹੀਂ ਦੇਖਿਆ ਸੀ, ਅਤੇ ਕਿਸੇ ਵੀ ਸਪੱਸ਼ਟੀਕਰਨ ਦੀ ਅਣਹੋਂਦ ਵਿੱਚ, ਉਹ ਹੈਰਾਨ ਹਨ ਕਿ ਕੀ ਨਸਲ (Race) ਇਸ ਦਾ ਕਾਰਨ ਹੋ ਸਕਦੀ ਹੈ। ਦੋਸਤਾਂ ਨੂੰ ਚਿੰਤਾ ਹੈ ਕਿ ਉਹ ਨਫ਼ਰਤੀ ਅਪਰਾਧ ਦਾ ਨਿਸ਼ਾਨਾ ਬਣੇ ਸਨ, ਉਨ੍ਹਾਂ ਦੱਸਿਆ ਕਿ ਭਾਈਚਾਰੇ ਵਿੱਚ ਦੱਖਣੀ ਏਸ਼ੀਆਈ ਲੋਕਾਂ ਪ੍ਰਤੀ ਦੁਸ਼ਮਣੀ ਚਰਚਾ ਦਾ ਵਿਸ਼ਾ ਰਹੀ ਹੈ।
ਪੁਲੀਸ ਜਾਂਚ ਅਤੇ ਮੇਜਰ ਕ੍ਰਾਈਮ ਯੂਨਿਟ ਦੀ ਕਾਰਵਾਈ
ਰਾਇਲ ਕੈਨੇਡੀਅਨ ਮਾਊਂਟਿਡ ਪੁਲੀਸ (RCMP) ਦੇ ਹਵਾਲੇ ਨਾਲ ਐਡਮਿੰਟਨ ਸਿਟੀ ਨਿਊਜ਼ ਪੋਰਟਲ ਨੇ ਸੋਮਵਾਰ ਨੂੰ ਦੱਸਿਆ, “ਜਾਂਚ ਰਾਹੀਂ ਪੁਲੀਸ ਨੂੰ ਪਤਾ ਲੱਗਾ ਹੈ ਕਿ ਸਿਵਿਕ ਕਾਰ ਵੱਲ ਇੱਕ ਹਥਿਆਰ ਚਲਾਇਆ ਗਿਆ ਸੀ, ਜਿਸ ਦੇ ਨਤੀਜੇ ਵਜੋਂ ਡਰਾਈਵਰ ਦੀ ਮੌਤ ਹੋ ਗਈ। ਮੇਜਰ ਕ੍ਰਾਈਮ ਯੂਨਿਟ ਹੁਣ ਜਾਂਚ ਨੂੰ ਸੰਭਾਲ ਰਿਹਾ ਹੈ ਅਤੇ ਕਤਲ ਦੇ ਮਕਸਦ ਦਾ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।”
ਗੁਰਕੀਰਤ ਸਿੰਘ ਮਨੋਚਾ ਦੀ ਮੌਤ ਅਤੇ ਵਿਦਿਆਰਥੀਆਂ ਦੀ ਸੁਰੱਖਿਆ
ਦੂਜੇ ਮਾਮਲੇ ਵਿੱਚ ਕੈਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆ ਵਿੱਚ, ਵਿਦਿਆਰਥੀ ਗੁਰਕੀਰਤ ਸਿੰਘ ਮਨੋਚਾ, ਜੋ ਬਿਜ਼ਨਸ ਮੈਨੇਜਮੈਂਟ ਦੀ ਡਿਗਰੀ ਲੈਣ ਲਈ ਫੋਰਟ ਸੇਂਟ ਜੌਨ ਆਇਆ ਸੀ, ਸ਼ੁੱਕਰਵਾਰ ਰਾਤ ਲਗਪਗ 11:10 ਵਜੇ ਚਾਰਲੀ ਲੇਕ ਬੋਟ ਰੈਂਪ ‘ਤੇ ਇੱਕ ਝਗੜੇ ਦੌਰਾਨ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਿਆ ਸੀ। RCMP ਅਧਿਕਾਰੀ ਉੱਥੇ ਪਹੁੰਚੇ ਤਾਂ ਉਸ ਨੂੰ ਗੰਭੀਰ ਹਾਲਤ ਵਿੱਚ ਪਾਇਆ, ਅਤੇ ਐਮਰਜੈਂਸੀ ਕੋਸ਼ਿਸ਼ਾਂ ਦੇ ਬਾਵਜੂਦ ਉਸ ਨੂੰ ਬਚਾਇਆ ਨਹੀਂ ਜਾ ਸਕਿਆ।
ਗੁਰਕੀਰਤ ਭਾਰਤ ਦੇ ਉਜੈਨ ਤੋਂ ਫੋਰਟ ਸੇਂਟ ਜੌਨ ਕਾਲਜ ਵਿੱਚ ਪੜ੍ਹਨ ਲਈ ਆਇਆ ਸੀ। ਨਾਰਥ ਡਿਸਟ੍ਰਿਕਟ ਮੇਜਰ ਕ੍ਰਾਈਮਜ਼ ਯੂਨਿਟ ਨੇ ਜਾਂਚ ਆਪਣੇ ਹੱਥ ਵਿੱਚ ਲੈ ਲਈ ਹੈ।
ਮੋਗਾ ਦੇ ਦਵਿੰਦਰ ਸਿੰਘ ਦਾ ਕਤਲ ਅਤੇ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ
ਤੀਜੇ ਮਾਮਲੇ ਵਿੱਚ, CTV ਨਿਊਜ਼ ਨੇ ਦੱਸਿਆ ਕਿ ਦਵਿੰਦਰ ਸਿੰਘ 13 ਮਾਰਚ ਨੂੰ ਕ੍ਰਾਊਨ ਕੈਬ ਲਈ ਗੱਡੀ ਚਲਾ ਰਿਹਾ ਸੀ ਜਦੋਂ ਉਸ ਨੇ ਹਿਚਿੰਗ ਪੋਸਟ ਮੋਟਲ ਤੋਂ ਇੱਕ ਕਾਲ ਦਾ ਜਵਾਬ ਦਿੱਤਾ। ਦਵਿੰਦਰ ਨੂੰ ਪਤਾ ਨਹੀਂ ਸੀ ਕਿ ਇਹ ਉਸਦੀ ਆਖਰੀ ਸਵਾਰੀ ਹੋਵੇਗੀ ਅਤੇ ਬਾਅਦ ਵਿੱਚ ਸਵੇਰੇ 8 ਵਜੇ ਤੋਂ ਪਹਿਲਾਂ, RCMP ਨੂੰ ਮੋਟਲ ਵਿੱਚ ਇੱਕ ਜ਼ਖਮੀ ਵਿਅਕਤੀ ਦੀ ਰਿਪੋਰਟ ਮਿਲੀ।
ਦਵਿੰਦਰ ਸਿੰਘ ਪਾਰਕਿੰਗ ਵਿੱਚ ਬੇਹੋਸ਼ ਪਾਇਆ ਗਿਆ ਅਤੇ ਪੈਰਾਮੈਡਿਕਸ ਵੱਲੋਂ ਉਸ ਨੂੰ ਮੌਕੇ ‘ਤੇ ਹੀ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਸਸਕਟੂਡੇ ਨਿਊਜ਼ ਪੋਰਟਲ ਨੇ ਆਰ ਸੀ ਐਮ ਪੀ ਦੇ ਹਵਾਲੇ ਨਾਲ ਦੱਸਿਆ ਕਿ ਜਾਂਚ ਤੋਂ ਸੰਕੇਤ ਮਿਲਦਾ ਹੈ ਕਿ ਦੋ ਮੁਲਜ਼ਮਾਂ ਵਿੱਚੋਂ ਇੱਕ ਨੇ ਕਥਿਤ ਤੌਰ ‘ਤੇ ਕਾਰੋਬਾਰੀ ਸਥਾਨ ‘ਤੇ ਇੱਕ ਹੋਰ ਵਿਅਕਤੀ ‘ਤੇ ਹਮਲਾ ਕੀਤਾ ਅਤੇ ਹਥਿਆਰ ਤਾਣਿਆ, ਅਤੇ ਮਿਲ ਕੇ ਉਨ੍ਹਾਂ ਨੇ ਕਥਿਤ ਤੌਰ ‘ਤੇ ਉਸ ਵਿਅਕਤੀ ਨੂੰ ਕਮਰੇ ਵਿੱਚ ਬੰਦ ਕਰ ਦਿੱਤਾ।
ਦਵਿੰਦਰ ਸਿੰਘ ਦੇ ਕਤਲ ਦੇ ਸਬੰਧ ਵਿੱਚ ਦੋ 19 ਸਾਲਾ ਨੌਜਵਾਨਾਂ, ਕੋਜੈਕ ਐਡਮਜ਼ ਅਤੇ ਗੈਰੇਨ ਬੈਪਟਿਸਟ ‘ਤੇ ਦੋਸ਼ ਲਾਏ ਗਏ ਹਨ। ਮੁਲਜ਼ਮਾਂ ਨੂੰ 30 ਮਾਰਚ ਤੱਕ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ ਹੈ। ਕ੍ਰਾਊਨ ਕੈਬ ਦੇ ਮਾਲਕ ਹਰਿਸ ਕੋਰਥ ਨੇ ਦੱਸਿਆ ਕਿ ਕੰਪਨੀ ਨੇ ਆਪਣੇ ਕੰਮ ਦੇ ਪਹਿਲੇ ਦਿਨ ਦੀ ਸਾਰੀ ਕਮਾਈ ਸਿੰਘ ਦੇ ਪਰਿਵਾਰ ਨੂੰ ਦਾਨ ਕਰਨ ਦਾ ਫੈਸਲਾ ਕੀਤਾ ਹੈ। ਸਿੰਘ ਵਿਆਹਿਆ ਹੋਇਆ ਸੀ ਅਤੇ ਮੂਲ ਰੂਪ ਵਿੱਚ ਪੰਜਾਬ (ਭਾਰਤ) ਦੇ ਮੋਗਾ ਦਾ ਰਹਿਣ ਵਾਲਾ ਸੀ। ਉਹ ਪਿਛਲੇ ਚਾਰ-ਪੰਜ ਸਾਲਾਂ ਤੋਂ ਕੈਨੇਡਾ ਵਿੱਚ ਰਹਿ ਰਿਹਾ ਸੀ।
ਭਾਰਤੀ ਕੌਂਸੁਲੇਟ ਵੱਲੋਂ ਅਸਥੀਆਂ ਭਾਰਤ ਲਿਜਾਣ ਦੀ ਪ੍ਰਕਿਰਿਆ ਵਿੱਚ ਛੋਟ
ਇਸ ਦੌਰਾਨ ਟੋਰਾਂਟੋ ਵਿੱਚ ਭਾਰਤ ਦੇ ਕੌਂਸੁਲੇਟ ਜਨਰਲ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਭਾਰਤੀ ਮੂਲ ਦੇ ਵਿਅਕਤੀਆਂ ਦੀਆਂ ਅਸਥੀਆਂ ਲਿਜਾਣ ਦੀ ਪ੍ਰਕਿਰਿਆ ਨੂੰ ਪਰਿਵਾਰਾਂ ਲਈ ਸੌਖਾ ਬਣਾਉਣ ਲਈ ਉਦਾਰ ਬਣਾਇਆ ਗਿਆ ਹੈ। ਹੁਣ ਮੌਤ ਦਾ ਸਰਟੀਫਿਕੇਟ, ਮੌਤ ਦਾ ਬਿਆਨ, ਫਾਰਮ 16 ਜਾਂ ਦਫ਼ਨਾਉਣ ਦੀ ਇਜਾਜ਼ਤ ਵਿੱਚੋਂ ਕਿਸੇ ਵੀ ਦਸਤਾਵੇਜ਼ ਨੂੰ ਅਸਥੀਆਂ ਭਾਰਤ ਲਿਜਾਣ ਲਈ ਵੈਧ ਮੰਨਿਆ ਜਾਵੇਗਾ। ਪਹਿਲਾਂ ਸਿਰਫ਼ ਡੈਥ ਸਰਟੀਫਿਕੇਟ ਹੀ ਸਵੀਕਾਰ ਕੀਤਾ ਜਾਂਦਾ ਸੀ।
